Ngā tūroro He wāhi whakamātūtū mō ngā tūroro i muri mai i te maimoatanga ki Te Hōhipera o Wildbase. He putuputu te taetae mai o ngā kararehe hou ki konei mahu ai, kātahi ka whakahokia ki ō rātou nōhanga i te ao tūroa.
Ngā kararehe noho He wāhi noho pūmau mō ētahi kararehe.
Kei te takiwā o te 2,500 ngā pāteke mōrehurehu i tēnei wā.
I whānau mai ngā pāteke o te taupuni nei, ki konei tonu, i raro i tētahi kaupapa whakatipu manu a Te Papa Atawhai, hei tuku atu anō ki te wao. I koni atu i te 200 ngā pīpī kua whakahokia ki te ao tūroa. He wā tērā e pukahu ana a Pāteke huri noa i Aotearoa, engari nā te whakaawa i ngā kūkūwai me te mahi a ngā konihi, kua riro ko Pāteke te manu wai mōmōhanga rawa atu.
Ko te punarua pāteke noho pūmau ki konei i paopao mai i te puni o Te Tarahiti Kararehe Mohoao o Isaac (ICWT) i te Mahuru 2012. Nā rāua anō te whiriwhiri kia moe tahi, ka kīia tērā he whakamoe ā-whiri.
He tino whaihua tā rāua moe tahi, inā he maha ō rāua uri i roto i ngā tau. He āwhina nui tērā kia piki anō ai te taupori pāteke mohoao, huri i Aotearoa. Tīmata ai te wā whakawhānau i Hōngongoi, tae atu ki te marama o Hereturikōkā i ia tau. E rua ngā kāwaiwai a te tokorua nei i ia tau, e 5 ki te 7 ngā pīpī o ia kāwaiwai.
He ōrite ngā tae o te uwha me te taurawhi, waihoki he pērā te nuinga o ngā kararehe mohoao o Aotearoa. Otirā i te wā whakawhānau ka whakaaturia e te taurawhi ōna kura ātaahua, he porowhita mā ki ōna karu, he kākāriki tīramarama tōna kakī. He iti ake te uwha i te taurawhi, ā, he tauri kākāriki kei te waewae o te uwha noho pūmau ki konei.
Kāore anō kia tapaina he ingoa ki te tokorua nei, engari taihoa ake ka tapaina he ingoa pai ki ēnei mātua autaia tonu.
